इटहरी
किसान कल्याण बचत तथा ऋण सहकारी संस्था लिमिटेडले भर्चुअल विधिबाट संस्थाको १९ औं वार्षिक साधारणसभा सम्पन्न गरेको छ ।
साढे १२ हजार सेयर सदस्य रहेको सहकारीले २०७७ साल मंसिर १३ गते शनिबार आफ्नो १९ औं साधारणसभा सिमित सदस्यहरुको उपस्थितीमा सम्पन्न गरेको हो ।
कार्यक्रमका प्रमुख अतिथि तथा नेकपा नेता भीम आचार्यले सहकारीहरुले उत्पादनलाई ध्यान दिनुपर्नेमा जोड दिनुभएको छ । संस्थाको वार्षिक साधारणसभामा बोल्दै नेता आचार्यले उत्पादनमार्फत् रोजगार र आर्थिक समृद्धिलाई जोड दिनुपर्ने बताउनुभयो । त्यसको लागि तालिम, विकासमा पनि ध्यान दिन संस्था सञ्चालक समितिलाई आग्रह समेत गर्नुभयो ।सहकारीहरु अनुशासित हुनुपर्नेमा जोड दिँदै आचार्यले राष्ट्रिय अर्थतन्त्रको मुख्य खम्बा भएकोले सहकारी क्षेत्रको समस्या समाधान गर्न सहकारीहरु नै अग्रसर हुनुपर्ने कुरामा जोड दिनुभएको थियो । उनले नेपालको राजनीति तथा अर्थतन्त्र अझै पनि संकटकालमा रहेको बताउँदै नयाँ उपायहरुको प्रयोग गर्दै अघि बढ्न संस्थालाई आग्रह गर्नुभएको छ ।संस्थाले कोरोना भाइसरका कारण गत मंसिर २ गतेदेखि सप्ताहव्यापी तालिका बनाएर सदस्यहरुको हस्ताक्षर संकलन गरेको थियो । साधारणसभाको अवसरमा सहकारीले विगतका उपलब्धिहरुको समिक्षा गर्दै विभिन्न योजनाहरु प्रस्तुत गरेको थियो ।अन्तर्राष्ट्रिय एक्सेस ब्राण्डको सिल्भर मेडल प्राप्त सहकारीले ७ वटा सेवा केन्द्रमार्फत् सेवा दिइरहेको छ । सुरुवातमा ३४ जना सदस्यहरुबाट एक हजार सात सय रुपैयाँ उठाएर स्थापना गरिएको सहकारीमा अहिले हजारौं सदस्यहरु छन् भने ७२ करोड बढीको सम्पत्ति रहेको अध्यक्ष शालिकराम ढकालले साधारणसभामा जानकारी दिनुभयो ।कार्यक्रममा सचिव थिरबहादुर खड्काले संस्थागत प्रतिवेदन प्रस्तुत गर्नुभएको थियो । वहाँले संस्थाको साङ्गठानिक स्वरुप, कार्यप्रगति, विनियम संशोधन लगायतका विविध पक्षको बारेमा जानकारी दिनुभएको थियो ।
साभार
फलैचा न्यूज –
मंसिर १३, २०७७
